తెలుగుతోపాటు హాలీవుడ్‌ చిత్ర పరిశ్రమలోనూ గుర్తింపు పొందిన నటి మంచు లక్ష్మి. ఆమె ‘బాస్మతి బ్లూస్‌’ అనే హాలీవుడ్‌ సినిమాలో నటించారు. ఈ చిత్రం ట్రైలర్‌ను తాజాగా విడుదల చేశారు. దీన్ని మంచు లక్ష్మి ట్విటర్‌ వేదికగా పంచుకున్నారు. ‘నా కొత్త హాలీవుడ్‌ సినిమా త్వరలో విడుదల కాబోతోంది’ అని ట్వీట్‌ చేశారు.

డాన్‌ బారన్‌ ఈ సినిమాకు దర్శకత్వం వహించారు. స్టీవెన్‌ అర్గిలా స్వరాలు అందించారు. బ్రీ లార్సన్‌, ఉత్కర్ష్‌ అంబుద్కర్‌, మంచు లక్ష్మి తదితరులు ప్రధాన పాత్రలు పోషించారు. షౌట్‌ ఫ్యాక్టరీ సంస్థ చిత్రాన్ని నిర్మిస్తోంది. ఫిబ్రవరి 9న ఈ సినిమాను విడుదల చేయడానికి సన్నాహాలు చేస్తున్నారు.

విదేశానికి చెందిన ఓ శాస్త్రవేత్త తను జన్యుపరంగా మార్పు చేసిన వరి ధాన్యాన్ని అమ్మడానికి భారత్‌కు వస్తుంది. ఆ ధాన్యంతో రైతులకు మేలు జరుగుతుందని భావిస్తుంది. ఈ క్రమంలో ఇక్కడి అబ్బాయితో ప్రేమలో పడుతుంది. ఆ ధాన్యం వల్ల రైతులకు మేలు జరిగిందా? లేదా? అనే విషయాన్ని తెరపై చూడాలి.